سنة 1975(و انا ما كنت خلقت وقتها) ,
عمل زياد الرحباني مسلسل إذاعي إسمو (بعدنا طيبين... قولوا الله).
يومها كانت الحرب اللبنانية بأوجها.
حكي زياد عن وجع, و عن حسرة.
و لأننا بلد بيقدس "هز الوسط", و بما إنو الوجع و الحسرة ممنوعين.
مُنعت هالحلقات من التداول (يعني صار اللي عندو اياها بيروح يسمعها مع بنت خالته- بالحبس).
و بما إنو كل ممنوع مرغوب.
كنت مستعدة إرتكب جريمة لأحصل على نسخة منهم.
و لإن الله بدو يسترها مع أهلي المعترين.
تفركشت بنسخة منهم.
و حياتكم, كنت كلما زياد حكي كلمة قول: "لا فض الله فاك"
المهم.
من كم يوم سمعت مقطع صغير منه.
عجيبة.
طلع زياد أقطع من ميشال حايك!!
و لِك, كإنو انكتب اليوم.
كإنو كتبوا عن هالأكترية الموجودة اليوم.
هالأكترية يللي كتير ب تهمها الحرية و السيادة و الإستقلال, بس, شو يعني إذا دول العالم كلها فاتت علبنان و فوتت سلاح, المهم الحرية و السيادة و الإستقلال.
و شو يعني إذا إسرائيل (بمساعدة قوات الأمم المتحدة) غيّرت ملامح الخط الأزرق, المهم الحرية و السيادة و الإستقلال.
و شو يعني إذا اتعدت كل يوم ع الصيادين و خطفت مواطنين لبنانيي و زادت مساحة الأرض المحتلة و جرفت مساحات من الضيع اللبنانية و سرقت مياه الوزّاني , المهم الحرية و السيادة و الإستقلال.
اقروا هالمقطع لزياد من "بعدنا طيبين... قولوا الله":
* خَيّي, لا تحاكيني و لا تقِل لي, أنا لبناني صميم.
- أنا مش عم قِلّك شي, يللي عم قِلّك ياه إنو الوضع اليوم بلبنان متعلّق بوضع الشرق الأوسط كله, و القضية الفلسطينية بالذات عم يِنْبَت فيها كِلاّ سوا هون.
*خَيّي, أنا لبناني صميم.
- منيح, بس قصة الحل اليوم قصة حل سلمي, و في قضية تحجيم المقاومة الفلسطينية لتخضع للحل المفروض عليها و يللي ب يتطلّب منها تنازلات كتيرة أكيد مِش لصالحها.
* يا خَيّي أنا لبناني صميم.
- طيّب بسيطة, أنا رح إنزل جيب ربطة خبز.
* أنا لبناني صميم.
- عظيم, عظيم. بتوَصّي شي؟
* يا خَيّي أنا لبناني صميم.
- ليك, بدّك تدير بالك منيح إنت, لإن مَرْتَك قِشعوها مبارح ضاهرة هيي وواحد.
* أنا لبناني صميم, ما بفهم.
- بعرف إنك ما بتفهم. طيب, قِللي قديش نمرة إجرك؟!
* خَيّي أنا لبناني صميم.
- بسيطة على كُلٍ. بخاطرك.
* وين رايح؟
- بدي فِلْ.
* لوين بدك تْفِل؟
- خيي بدي فِلْ. لإن ب يتهيّأ لي إنو ما في مجال نتفاهم.
* ليش ما في مجال نتفاهم؟ منتفاهم, ليش ما بدنا نتفاهم؟؟
- منتفاهم, عال. بس خود و اعطي عْلَيّي. مش كلما قِلّك شغلة تقللي (أنا لبناني صميم)!!!
* ليش خيي؟, ما أنا لبناني صميم.
- يا الله, هلق أنا عم قِلّك إنك مش لبناني صميم؟؟ أنا يللي عم بطلبوا منك إنك حاجة تقولها هيدي (أنا لبناني صميم)!!
* بدي قول. هيدي شغلة أنا مش مستحي فِيا. أنا لبناني صميم.
- طيب ليك, شو رأيك إذا قلتلك إنو أنا كمان لبناني صميم؟؟
* إيه, و أنا لبناني صميم.
- عَ راسي و عيني يا خيي, يا حبيب قلبي, يا تسلملي, إنت لبناني صميم و أنا لبناني صميم, صرنا اتنين. بس لازم نعمل شي من شان لبنان!!
* خيي, أنا ما دَخَلْنِي بكل هالإشيا, أنا لبناني صميم و بس.
- ما دخلك بلبنان؟؟!! كيف ما دخّلّك بلبنان؟؟!! لازم تعمل شي كرمال لبنان.
* ليك حبيبي, انا ما فارقة معي لا إنت و لا لبنان, أنا لبناني صميم و مش فارقة معي الدنيا كلها.
(إنتهى).
بشرفكم, إنتو مش معي إنو لازم نهني الإخوان بالأكترية؟!!!
عنجد لازم نهنيهم. لإن كلهم: (لبناني صميم)...
زينب.
